اللي بيقولوا الأمومة مش سهلة بس مستاهلة، او سهلة ومستاهلة أو بيتكلموا عن الام المثالية ومواصفاتها وتضحياتها، والامهات بتاعة زمان وبتاعة دلوقت، هاحكيلهم حدوتة صغيرة تبين ياعني إيه أم.
النهاردة لولو
هانم مرحتش الحضانة، انا كأم أشتبهت أن حرارتها ممكن تزيد، وبالتالي خليتها معايا،
وفي نص اليوم حصل أجتماع على السكاي بي للشغل، وبنتي المصونة والجوهرة المكنونة
خلال الاجتماع بس عملت الاتي:
1.
مسكت اللبن ودلقته على السرير وطلعت كل
الوايبس ومسحت بيه اللبن.
2.
كلمت ماما، وبعت رسايل للسعودية خلصت رصيدي.
3.
فتحت درج كوميدينو باباها وطلعت الورق اللى
فيه وقطعته.
4.
فتحت دولابي وطلعت شنطي ونكلت بيهم أيما
تنكيل.
كل ده قدامي طبعا
وانا مقدرش أقول كلمة، مش هاقول للناس عن اذنكم بنتي بتدمر الشقة، ده غير الكلام
اللطيف اللي بسمعه في الاجتماع، هي ديه الامومة يا حضرات.
الامومة هي اني
اتسأل عشر مرات في الدقيقة "دادا" فين، معه إنه في ايديها، اه والله في ايديها،
بس هي سألتني كل الأسئلة اللى في الدنيا وخلصت خلاص، مفاضلش غير تسألني ايه اللى
في ايديها زيادة في التعذيب، ولما أقولها دادا هرب تقولي لأ اهو.
الأمومة تربية
وتهذيب وأصلاح، بس مش انا اللى بربي لأ، أنا بتربى بكل الوسائل.
